Башкортстан социаль челтәрләрендә сары кар яву турында хәбәр итәләр
Нефтекама шәһәрендә яшәүчеләр сары кар Кытайдагы ком бураны аркасында барлыкка килгән дип фаразлый.
Башкортстанның Нефтекама шәһәрендә яшәүчеләр сары кар яву турында социаль челтәрләрдә яза. Бу турыда «Башинформ» хәбәр итте.
Челтәрдәге фотоларга карап кына карның сары булуын аңлап та булмый. Ләкин шәһәр халкы «сары кар ява» дип яза.
«Мондый хәбәрләр Ульяновск өлкәсеннән дә килә. Галимнәр фикеренчә, бу Кытайдагы ком бураны сәбәбе булуы ихтимал», — ди шаһитлар.
«Башинформ» агентлыгы эколог Денис Насыйров белән аралашкан.
«Бу ком бөртекләре, тимер оксиды — теләсә ни булырга мөмкин. Үрнәкләр алып, составын ачыкларга кирәк. Шул чакта бу матдәнең каян килгәнен белеп булачак. Кытайдан булуы шикле инде. Бүген җил көньяктан исте, ул андый көчле дә булмады», — ди эколог.
Бүген социаль челтәрләрдә Татарстанның көньяк-көнчыгышында сары кар явуы турында хәбәр барлыкка килде, дип яза «Татар-информ» агентлыгы.
ТР Экология министрлыгының матбугат хезмәтендә искәртүләренчә, ведомствоның Көньяк-Көнчыгыш территориаль идарәсе инспекторлары вакыйга урынына барып, кар үрнәкләрен алачак. Анализ нәтиҗәләре җиде көн эчендә билгеле була, диелә бу хәбәрдә.