Башкортстан прокуратурасы «Башкорт» хәрәкәтен экстремистик дип тануны сорый
«Башкорт» иҗтимагый оешмасы бу дәгъваларны урынсыз дип саный.
Прокурор Владимир Ведерников Башкортстанның Югары судыннан «Башкорт» иҗтимагый оешмасын экстремистик дип тануны сорый.
Прокуратура дәгъвасы уңай хәл ителгән очракта, бу оешманың атамасын, логотибын кулланырга ярамый, Вконтактеда 60 мең чамасы язылучысы булган төркем дә эшчәнлеген туктатырга тиеш булып чыга. 7 февральгә бу шикаять буенча беренче утырыш билгеләнгән. Бу хакта судья Г.Р. Фәрхетдинова имзалаган хәбәрдә әйтелә, дип яза «Эхо Москвы» сайты.
Узган елның 25 декабрендә «Башкорт» иҗтимагый оешмасы прокуратурадан «Экстремистик эшчәнлек алып барырга ярамаганлыгы турында кисәтү» алган булган. Оешмага хокук бозуларны төзәтү өчен ике ай вакыт биргәннәр, тик төгәл дәгъвада нинди хокук бозулар икәне төгәл күрсәтелмәгән.
Ул вакытта оешманың сәхифәсендә әйтелгәнчә, Башкорт Дәүләт университеты белгечләре «Башкорт» оешмасы җыеннар уздырганда экстремистик юнәлештәге чаралар да уздыра дигән нәтиҗә әзерләгәннәр.
Активистлар бу карар буенча шикаять бирергә ниятли, чөнки «Башкорт» оешмасы бернинди дә экстремистик эшчәнлек алып бармый, диләр алар
Декабрь башында әле оешма офисында берничә мәртәбә тикшерү булган. Ул вакытта прокуратура хезмәткәрләре активистларга бер гражданның аноним рәвештә «Башкорт»ның экстремистик эшчәнлеге турында хәбәр иткән. Ә Икътисади иминлек идарәсе хезмәткәрләре әйтүенчә, бер төркем кеше Башкортстанның Эчке эшләр министрлыгы башлыгы Роман Деевка хат язып, оешманың эшчәнлегеннән зарланган.