Башкортстан кешесен урлап алып китеп, гаражда бикләп тотканнар
41 яшьлек ир-ат ишекне ачмагач, җинаятьчеләр балконнан кереп, хуҗаны кыйнаган һәм машинага утыртып алып киткәннәр.
Башкортстанның Стәрлетамак шәһәрендә 21 дән 36 яшькә кадәрге дүрт ир-атны тоткарлаганнар. Моңа кадәр Гафури районының Красноусол авылында яшәүче 41 яшьлек ир-ат полициягә шалтырата һәм үзен гаражга бикләп куюларын хәбәр итә. Бу турыда "Башинформ" яза.
Хокук саклаучылар бу ир-атның кайда булуын ачыклый. Җинаять эше ачалар.
Россия Тикшерү комитетының Башкортстан буенча Тикшерү идарәсе белешмәсе буенча, 6 февральдә 41 яшьлек ир-атның өенә Стәрлетамакта яшәүче дүрт ир-ат килә.
41 яшьлек ир-ат ишекне ачудан баш тарткач, алар фатирга балконнан керә. Хуҗаны кыйныйлар, 50 мең сум акча бирүен таләп итәләр. Аның телефонын урлыйлар, үтерү белән янап, машинага утырталар. Ир-атны Стәрлетамакка алып китәләр һәм бәйләп, гаражга бикләп куялар, дип сөйли тикшерүчеләр.
Җинаятьтә шикләнелүчеләрне тоткарлаганнар һәм тикшерүчеләргә тапшырганнар, диелә хәбәрдә.
