Башкортстан кешесе Гашыйклар көне алдыннан сөяркәсенең умырткасын сындырган
42 яшьлек ире вәхшиләрчә кыйнап имгәткән 37 яшьлек хатын икенче көнне вафат булган.
Башкортстанның Тәтешле районында 13 февральдә, Гашыйклар көне алдыннан, канлы фаҗига була. 42 яшьлек ир-ат бергә яши торган 37 яшьлек хатынын имгәтә. Хатын икенче көнне вафат була. Бу турыда «КП-Уфа» хәбәр итте.
14 февраль иртәсендә хатынны ашыгыч ярдәм машинасы белән район хастаханәсенә китерәләр. Ул вәхшиләрчә кыйналган, имгәнеп беткән. Табиблар аның баш мие имгәнгәнен, арка мие бәрелгәнен, муен умырткасы чыккан һәм сынган булуын ачыклый. Табиблар бу вакыйга турында полициягә хәбәр итә.
Хокук саклаучылар ачыклаганча, 13 февральдә кич белән бу хатын һәм аның бергә яши торган ире арасында низаг чыга. Соңрак ир бу турыда үзе сөйли. Ул ярсынган вакытта сөяркәсен кыйнап ташлавын әйтә. Исерек ир-ат көнчелек аркасында сөягәнен имгәткән, диелә хәбәрдә.
Җинаять эше ачылган, ир-ат тоткарланган.
