Башкортстан газетасы редакциясенә карак һөҗүм иткән - видео
Хезмәткәрләр чәй эчеп утырганда, кыштырдаган тавыш ишетеп ала. Журналистлар каракны куа китә, тик барыбер тота алмыйлар.
Уфада «Киске Өфө» газетасы редакциясенә карак кергән. Хезмәткәрләр барысы бер бүлмәдә чәй эчеп утырган чакта, басманың баш редакторының кабул итү бүлмәсендә кыштырдаган тавыш ишетәләр. Бу турыда «Башинформ» хәбәр итте.
Хезмәткәрләр кабинеттан чыга һәм билгесез ир-ат сумкалар актарып ятуын күрә. Карак качып китә, ул урамга чыга, журналистлар аны куа китә. Каракны тоткач, ул борычлы баллоннан сыеклык сиптерә һәм барыбер качып котыла. Әлеге ир-атны мобиль телефон камерасына төшереп өлгерәләр.
Газета хезмәткәре Зәйтүнә Нигъмәтҗанова сүзләренчә, редакция полициягә мөрәҗәгать иткән. Бу инде беренче генә очрак түгел икән. Ярты ел элек ишекне ватып кереп, редакциядән акчаны алып чыгып киткән булганнар.
Хәзер каракны полиция эзли.