Башкортстан егете Минзәләдә һәлакәткә очраган самолетка өлгермәгән һәм исән калган
Фаҗигадә аның энесенең гомере өзелгән.
Башкортстанда яшәүче Александр Цывинский Минзәләдә һәлакәткә очраган самолетта очарга тиеш булган. Әмма ул очкычка соңга калган, дип яза Уфа1.ру.
Александр сөйләгәнчә, ул телефоннан сөйләшкән һәм шуның аркасында рейска соңга калган. Кызганыч, бу фаҗигадә аның энесенең гомере өзелгән. Аңа парашюттан сикерүне 18 яшьлегенә бүләк иткән булганнар.
10 октябрьдә, Татарстанның Минзәлә районында L-410 җиңел моторлы самолеты һәлакәткә юлыкты. Бортта 22 кеше булган, 16 кеше һәлак, калган алты парашютчының гомере өчен табиблар көрәшә.
Самолетта Башкортстаннан килгән алты кеше булган, аларның дүртесе һәлак булды, икесе зыян күрде.
Дүшәмбе, 11 октябрь Татарстанда мәтам көне дип игълан ителде.
