Башкалада җир асты кичүендә яңа туган баланы ташлап калдырганнар
Баланың сәламәтлегенә куркыныч янамый.
Мәскәү метросы хезмәткәрләре «Җиңү Паркы» станциясе янындагы җир асты кичүендә яңа туган сабый тапкан. Бу хакта РИА Новости яза.
«Җир асты кичүе Мәскәү метрополитены территориясенә керми. Урынга тиз арада ашыгыч ярдәм һәм полиция чакырылды», — диелә хәбәрдә.
Полициядә сөйләүләренчә, 5:12 сәгатьтә бала табылу турында хәбәр иткәннәр. Беренче карашка ике-өч айлык булган бала тукымага төрелгән була. Полиция хезмәткәрләре аны хастаханәгә илткән, табиблар аның сәламәтлеген тикшерә.
Мәскәүнең балалар омбудсмены Ольга Ярославская табылган баланың малай булуын әйтте. Хәзер ул Сперанский исемендәге балалар хастаханәсендә дәвалана.
«Хатын-кыз күзәтү камераларына эләккән, аны эзлиләр», — дип өстәде Ярославская.
Россиядә бала хокуклары буенча вәкаләтле вәкил Анна Кузнецова малайның әле яхшы булуын, сәламәтлегенә берни дә янамавын әйтте. Ул хастаханәдә тагын берничә көн булачак.
Тикшерү комитеты уздырган тикшерү нәтиҗәләре буенча куркыныч астында калдыру маддәсе нигезендә җинаять эше ачылган. Ананы 5 елга кадәр ирегеннән мәхрүм итүләре мөмкин.