«Барысы да ток сугудан егыла». Балыкка баручы балалар электр үткәргечкә кармак тидергән

Самараның Чапаев шәһәрендә 3 малай балыкка бара. Урамнан барганда, алар кармакларын электр үткәргечләргә тидерә. Бу турыда РЕН ТВ хәбәр итте.

Әлеге вакыйга кадрларын «РЕН ТВ» күрсәтте. Видеода күренгәнчә, малайларның берсе сикереп, кармагын үткәргечкә тидерә. Аннары ток суга – балалар барысы да җиргә егыла. Аннары сикереп торалар да төрле якка чабалар.

Якынча белешмә буенча, малайлар исән.

Россия Тикшерү комитетының Самара өлкәсе буенча Тикшерү идарәсе хәбәр иткәнчә, тикшерү оештырылган.

«29 майда Чапаев шәһәренең Мәскәү урамыннан баручы балигъ булмаган яшьтәге 3 малай кармак белән электр линиясенә тигән. Ток суккан балалар төрле дәрәҗәдә пешкән, хастаханәдә яталар», – диелә хәбәрдә.