Травматолог-ортопед Константин Терновой Sputnik радиосына интервьюда бармаклар яки муен шартлату гадәтенең зыяны турында аңлата. Әлеге гадәт буыннарны вакытыннан алда «пенсиягә озату» дип атый.
«Шартлаткалап» алырга яратучылар үз сәламәтлегенә зыян китерә.
«Күпләр бармаклары яки муенын шартлатырга ярата. Бу, нигездә, кул чуклары яки муендагы мускуллар көчәнеше белән бәйле, шуңа күрә шартлатасы килә. Кешеләр даими рәвештә көненә 20-30 тапкыр шулай эшләсә, бу – хәрәкәт неврозы кебек. Тырнак кимерүчеләр кебек», – ди табиб.
Бу – бөтен мәгънәдә начар гадәт санала икән. «Куллар һәм муен буыннарын күп тапкыр шартлату стабильлекне бетерә, буыннар «бушый». «Бушаган» буыннар тиз таушала, артроз барлыкка килә. Буыннарны гел бушатып торсагыз, 50 яшьтә үк артроз барлыкка килә, ә ул 70 яшьтә генә башланырга мөмкин», – дип кисәтә табиб.
Әлеге гадәттән котылу өчен массаж ярдәм итә: профессионал мускуллар көчәнешен бетерә, аннары «шартлатасы» килү теләге дә бетә.
Әгәр бу мускуллары көчәнешенә бәйле булмаса, начар гадәт булса, псхиатрга мөрәҗәгать итеп, хәрәкәт неврозын дәваларга кирәк, диелә хәбәрдә.