Кышка саклый торган бәрәңгене – уртача һәм соң өлгерә торган сортларны – сентябрь уртасына кадәр алырга кирәк. Бу турыда «Челнинские известия» яза.
Көзнең беренче ае башлангач, бәрәңге бүлбеләре үсүдән туктый, кабыгы калыная.
Бәрәңге бүлбеләре өлгергәнме икәнен сабагына карап белеп була. Бәрәңге сабагы саргаеп, кибә башласа, ике-өч атнадан бәрәңгене алырга ярый.
Казып алганнан соң, бәрәңгене берничә тәүлек киптерергә кирәк. Аннары саклауга салыр алдыннан, бер атна чамасы салкынча урында тотарга. Бу вакыт эчендә зарарланган бәрәңгеләр күренәчәк, аларны саклауга салырга ярамый.
Бәрәңгене базга салыр алдыннан бакыр купоросы эремәсе белән эшкәртегез. Моның өчен 2-3 грамм препаратны 10 литр суда эретегез, диелә хәбәрдә.
