Банктан 25 миллион сум урлаган Луиза Хәйруллинаның ире баштагы күрсәтмәләреннән баш тарткан
Банктан 25 миллион сум урлаган Луиза Хәйруллинаның ире баштагы күрсәтмәләреннән баш тарткан
27 май көнне Башкортстанның Салават шәһәрендә банкта эшләүче Луиза Хәйруллина банк кассасыннан 25 миллион сум алып чыгып киткән иде. Шуннан соң ул гаиләсе белән юк булды. Күптән түгел хатынны Казанда тоткарладылар.
Луиза акчаны комарлы уеннар белән мавыгучы ире аркасында урлаган булып чыкты. 25 миллион сум акчаны да ире уйнап бетергәне ачыкланды.
Луиза Хәйруллина хәзер сак астында. Ә менә моңарчы "мин ул акчаны уйнап бетердем, гафу итегез" дип сөйләгән ире Марат Хәйруллин күрсәтмәләреннән баш тарткан.
Бүген ул, хатынын гына гаепләп, ул акчаны үзе генә урлады, акчаның кайда яшерелгәнен белмим, дип күрсәтмә биргән. Бу хакта Башкортстан матбугат чаралары яза.
"Мин тамашачылар алдында гафу үтенәм. Мине Первый каналга хатынымны яклаган адвокатлар барырга мәҗбүр итте. Алар миңа хокукый җаваплылыкны аңлатмады. Мин аларның сүзен сөйләдем", - дигән ул бүген.
Марат хатынына акча урларга булышмавын әйткән, акчаның кайда икәнен белмим дип белдергән.
Марат белән Луизаның ике баласы - 12 яшьлек Регина һәм 8 яшьлек Елена хәзерге вакытта Салават шәһәрендә бабалары Рамил Муллахмәтов белән яши.