Уралда балык тотучы ир-ат кармагы белән электр линиясенә эләккән һәм аны ток сугып үтергән. Бу турыда «Вести» каналы Россия Тикшерү комитетының Свердловск өлкәсе буенча Тикшерү идарәсенә сылтама белән хәбәр итте.
36 яшьлек ир-ат 23 майда Түбән Тагил шәһәре янында һәлак булган. Ир-ат сулыкка балык тотарга килә. Ул балык тоту җайланмаларын чыгара, 5 метр озынлыктагы кармагын селтәп җибәрә һәм электр тапшыру линиясенә тиеп китә. Ир-ат ток сугудан шунда ук һәлак була.
Ул балыкка хатыны һәм балалары белән килгән булуы билгеле. Фаҗига вакытында әти кеше гаиләсеннән читтәрәк була. Тавыш ишеткәч, алар йөгереп килә, тик әтиләренә ярдәм итә алмыйлар.
Тикшерү бара, диелә хәбәрдә.