Балык тоту ятьмәсе 35 яшьлек ир-атның үлеменә сәбәпче булган
Актаныш районы Карт авылыннан ерак түгел бер буада фаҗига була. Балыкчы көймәсендә әйләнеп каплана, балык тоту ятьмәсенә чорналып баткан, дип хәбәр иттеләр “Татар-информ” мәгълүмат агентлыгына Россия Гадәттән тыш хәлләр министрлыгының Татарстан Республикасы буенча Дәүләт идарәсе матбугат хезмәтендә.
Кичә иртән ашыгыч хезмәтләрне чакыру буенча 112 номерына, Карт авылыннан ерак түгел бер буада кеше гәүдәсе табылуы турында хәбәр итәләр. Әйтелгән урынга килгән 103 нче коткару бүлеге хезмәткәрләре судан Карт авылында яшәгән 35 яшьлек ир-атның гәүдәсен чыгара һәм Актаныш Үзәк район хастаханәсе хезмәткәрләренә тапшыра.
Якынча мәгълүматларга караганда, алдагы көнне кичен ир резин көймәдә балык тоту ятьмәсе белән балык тоткан. Берзаман көймә әйләнеп каплана, балыкчы ятьмәгә чорнала һәм батып үлә.
