Балтач районында 19 яшьлек егетнең иңбашына агач борыс кергән һәм аркылы тишеп чыккан
Татарстанның Республика клиник хастаханәсе табиблары 19 яшьлек егетне коткарган. Аның иңбашына агач борыс кергән һәм аркылы чыккан. Бу турыда клиниканың матбугат хезмәтенә сылтама белән «Татар-информ» хәбәр итте.
Егет иске корылманы сүтә. Бер мизгелдә аның өстенә стена ава, борыс егетнең иңбашына кереп тишеп чыга. Имгәнгән егетне Балтач районыннан санавиация белән РКБ травмотология үзәгенә китерәләр.
«Егетнең умрау сөяге бик катлаулы итеп сынган, башы бәрелгән, таз-бот сөякләре сынган. Могҗиза белән генә аның үпкәләренә дә, җитди артерияләренә дә зыян килмәгән», - дип аңлатканнар хастаханәдә.
Табиблар аңа операция ясаган, ул авыр хәлдә, реанимациядә ята. Табиблар сүзләренчә, тормыш өчен әһәмиятле булган органнарына, кан тамырларына зыян килмәгән, тик инфекция таралу куркынычы бар. Хәзер аның гомере өчен табиблар көрәшә, диелә хәбәрдә.