Тиздән Яңа ел җитә, һәм блогерлар Яңа ел табыны өчен рецептлар белән уртаклаша, хуҗабикәләр рецептлар барлый башлады. Аш-су блогеры Рәмзия Вәлиева тәмле итеп үрдәк пешерү серләре белән уртаклаша.
Үрдәкне ярты кап тоз салынган суда 24 сәгать тотарга. Судан алырга, эчен-тышын корытырга.
Соус өчен: 1 аш кашыгы бал, 1 аш кашыгы соя соусы, 1 бал кашыгы аджика, 1 аш кашыгы лимон согы, 1 аш кашыгы әфлисун согы, 1 тырнак сарымсак.
Үрдәкнең эчен-тышын соус белән сылап чыгарга, тәме сеңсен өчен, түшкәнең итлерәк урыннарын тишкәләргә була.
Үрдәк эченә алма, караҗимеш, әфлисун тутырырга һәм 2 сәгать тотарга. Аннары «рукав»ка салып, 180 градуска кадәр кызган духовкага куярга, «рукав»ны берничә җирдән тишкәләргә. Үрдәк пешеп чыгар алдыннан, «рукав»ны ачып, кызартып алырга.
Тәмле булсын!