Балконда керләрне киптерү нәрсәсе белән куркыныч?

Шәһәр шартларында балконда кер киптерүнең бернинди файдасы юк. Керләр сафлану урынына Менделеев таблицасындагы элементларны җыя. «МедикФорум» сайтында «Тормыш киңлеге экологиясе» лабораториясе директоры Антон Ястребцевнең шундый фикере чыккан.

«Юылган керләрне шәһәр шартларында балконда киптерү әйбәт идея түгел. Еш кына фатирлар юл янында урнашкан була. Тәрәзә янындагы дымлы керләр фильтр ролен үти. Анда төрле кисәкчекләр җыела. Шәһәрдәге кисәкчекләр тузан гына түгел, ә авыр металлар, корым, көпчәкләр ышкылудан барлыкка килгән тузан. Болар барысы да канцерогеннар», — ди белгеч.

Ястребцев шулай ук урын-җирдә кешенең көнгә сигез сәгать чамасы үткәрүен, һәм шул рәвешле, бу кисәкчәләрне сулавын искәртә.

Эксперт фикеренчә, тәрәзәләр юл өстенә түгел, ә яшеллек күп булган ишегалдына чыкса, керләрне һавада киптерергә була.