«Баласын коткарган». Акула талап үтергән турист хатын танылган музыкант кызы булган

Мексикада акула һөҗүм иткәндә һәлак булган турист хатын танылган музыкант кызы булып чыккан. Бу турыда РЕН ТВ хәбәр итте.

Фаҗига 2 декабрьдә була. Мария Фернанда Мартинес Хименес ярдан 20 метр ераклыкта улы белән йөзә. Акула килгәнен күргәч, ул баласын платформага утырта һәм ярга төртеп җибәрә.

• Турист хатын 5 яшьлек баласын коткарырга маташканда, аягын акула тешләп өзгән, дип язган идек.

Мария Фернанда Мартинес Хименес исемле бу хатын популяр музыкант Анхель Мартинес Аррегин кызы икән.

Аррегин чыгыш ясый торган ансамбльнең социаль челтәрләрдәге сәхифәләрендә әлеге хәбәрне раслаганнар.

«Дуслар, мәрхүмә рухына һәм Анхель Мартинес Аррегинга һәм аның бөтен гаиләсенә әлеге кайгыны кичерергә көч сорап дога кылуыгызны сорыйбыз», – дигән музыкант вәкиле.

Марияне Гвадалахар штатында 4 декабрьдә җирләгәннәр.