Баланы арыслан талаган өчен, цирктан биш миллион таләп итәләр (һөҗүм мизгеле видеосы)
Фаҗигадән соң күчмә цирк директорын кулга алганнар.
Кубань өлкәсендә циркта нәни кызга арыслан һөҗүм иткән. Баланың әти-әнисе мораль зыянны каплау өчен, цирктан биш миллион сум акча таләп итә. Алар судка гариза биргән. Бу турыда ТАСС агентлыгы хәбәр итә.
Әти-әнинең гаризасы җинаять эшенә өстәлгән. Бу фаҗигадән соң күчмә цирк директорын кулга алалар. Аның милегенә арест салына.
- Фаҗига октябрь азагында була. 4 яшьлек кыз цирк-шапито тамашасы вакытында алдагы рәттә утыра. Аренага чыккан ана арыслан балага ташлана. Сабый җитди җәрәхәтләр ала.
4 яшьлек кыз исә әлегә кадәр хастаханәдә дәвалана. Аның битендәге нервы җәрәхәтләнгән. Табиблар балага берничә тапкыр операция ясаган, дип хәбәр итә РЕН ТВ каналы.
