«Балаларына Раяз исеме кушучылар артты» – Раяз Фасыйхов исеменең мәгънәсен аңлатты

Татарстанның атказанган артисты Раяз Фасыйхов «Татар радио»сында туры эфирда катнашкан. Эфир вакытында ул үзенең исеменең мәгънәсен аңлатты. 

Радио тыңлаучыларның берсе: «Раяз сәхнәгә чыга башлаган көннән башлап, балаларына Раяз исеме кушучылар бермә-бермә бер артты. Рәхмәт», – дип, хәбәр юллаган. «Менә ул – уңыш. «Нәрсә ул уңыш?» – дип сорасалар, менә җавап», – дип шаярта тапшыруны алып баручыларның берсе Зөлфәт Зиннуров. 

«Әйе, ул исем белән бәйле күп сораулар да булды, дөрес түгел, диләр. Раяз дигән исем юк бит ул, Рияздыр ул, диләр. Юк инде, Раяз кушканнар, дип җавап бирәм. Ничек тәрҗемә ителә, диючеләргә: «Ра – Кояш Алласы, яз – яз инде, кояшлы яз. Рәхәтләнеп кушыгыз», – диде Раяз Фасыйхов.