Кукмара мәдрәсәсе мөдире, мөгаллим Ришат хәзрәт Курамшин «ВКонтакте» челтәрендә сәхифәсендә балаларны иртәнге намазга уяту турында аңлата.
Җомга намазы вәгазендә намазларны вакытында укуның кирәклеге турында кат-кат кабатлангач, кайтып китәр алдыннан, Идрис абый хәзрәткә дәшеп, үзен борчыган соравын бирде:
Без үзебез хатын белән намазларны вакытында укып барабыз. Ә менә балаларны иртәнге намазга уятырга кызганабыз: йокыларының иң тәмле вакытына туры килә бит бу намаз! Бигрәк тә хәзер, җәйге вакытта…
Уятырга кирәк, уятырга... Балачактан тәртипкә күндермәсәң, соңыннан өйрәтүе кыен була, – дип җавап биргән имамга Идрис абый болай диде:
Уятып карамыйбыз түгел, дәшәбез, хәзрәт, ләкин йокылары шуның кадәр тирән, шуның кадәр татлы... Шуңа күрә кызганып борчымыйбыз, йокласыннар, дибез.
Хәзрәт бермәл нидер турында уйлап алганнан соң, болай диде:
Әгәр йортыгызга ут кабып янгын башланса – уятасызмы балаларыгызны?
Имамның шушы фикереннән аптырап, абзый аңа сәерсенеп карап куйды:
Бу очракта, әлбәттә, уятачакбыз, сүз дә юк.
Әмма алар бит татлы йокы белән тирән йоклыйлар? – дип тагын бер сорау бирде мулла.
Юк инде, болай булса, аларны муеннарыннан өстерәп тартып төшерергә туры килсә дә уятачакбыз.
Шуннан соң имам фикеренең һәр сүзенә басым ясагандай, әйтте:
Бу дөнья утыннан саклап калыр өчен шулай эшләгәч, балаларыгызны җәһәннәм утыннан йолып алыр өчен дә нәкъ шулай ук эшләргә кирәктер…
Ришат хәзрәт Курамшин әзерләде
