Балаларга күз тимәсен өчен нишләргә?

Тимергали хәзрәт Юлдашев телеграм-каналында балаларга күз тиюдән саклану турында аңлата.

«Балалар күз тиюгә тагы да сизгер була. Кечкенә балага күз тигән булса, алар көйсезләнә, елый башлый, юньләп ашамый, кирелек күрсәтә. Болардан тыш, кайвакыт балаларның авыруы да күз тию сәбәпле булырга мөмкин.

Мондый очракларда балаларга түбәндәге доганы укып өшкерү яхшы булыр.

Расүлуллаһ салләллаһу галәйһи вә сәлләм оныклары Хәсән белән Хөсәенгә мондый дога укый торган булган: «Угииз‌үкүмә («з» хәрефен сакау итеп укыйбыз) бикәлимәәтилләәһит-тәәммәти миң күлли шәйтаниү вә һәәммәти вә миң күлли гайнил-ләәммәһ».

Мәгънәсе: «Сезне шәйтаннан, агулы бөҗәкләрдән һәм һәрбер начар күздән сакласын өчен, Аллаһның камил сүзләренә сыенам».

Барчагызга да бәрәкәтле, игелекле, догалы көннәр теләп калам», – дип яза хәзрәт.