Балалар утырган машина таудан тәгәрәп төшеп киткән
Көньяк Уралда булган фаҗигадә ун һәм җиде яшьлек ике бала имгәнгән.
24 августта Чиләбе өлкәсенең Сим шәһәре янында М5 трассасында идарә ителми торган пикап таудан төшеп киткән. Бу вакытта машина эчендә ун һәм җиде яшьлек ике бала булган. Чиләбе телевидениесе шул хакта хәбәр итте.
Шаһитлар сүзләренчә, Ямал-Ненец автономияле округыннан килә торган гаилә тау түбәсендә тукталыш ясый. Алар «чокыр эчендәге шәһәр» фонында фото төшермәкче була. Ир белән хатын салоннан чыга, аларның ике баласы машинада утырып кала. Балалар ручнигын ычкындыргач, машина таудан тәгәрәп төшеп китә. Идарәсез калган автомобиль шәхси йортның сараена бәрелеп туктый.
Машина шактый каты җимерелгән, аның бамперы, капоты изелгән, кузовы да ватылган. Гадәттән тыш хәлләр министрлыгы хезмәткәрләре балаларны машинадан чыгарган. Алар сабыйларны металл арасыннан алу өчен гидравлик корал кулланган.
«Ике баланың да баш мие селкенгән, җиде яшьлек малайның эче дә имгәнгән», — дип сөйләгәннәр төбәк буенча Гадәттән тыш хәлләр министрлыгында. Хәзерге вакытта балаларны хастаханәгә озатканнар. Фаҗиганең сәбәпләрен хокук саклаучылар ачыклый, диелә бу хәбәрдә.
