Балалар коронавирус белән ничек авырый?
Яңа коронавирус белән балалар сирәгрәк һәм җиңелрәк авырый.
Балалар коронавирус белән сирәк авырый. Алар авыруны җиңел уздыра. Фәнни чыганаклардан күренгәнчә, балалар коронавирус инфекциясен йөртүчеләр генә булып тора. Бу хакта, Россия Сәламәтлек саклау министры Михаил Мурашко сүзләренә нигезләнеп, РИА Новости яза.
«Яңа коронавирус белән балалар сирәгрәк һәм җиңелрәк авырый. Бу, әлбәттә инде, яхшы. Балаларның әлеге авыруны, үзләре дә белмичә, таратуы билгеле. Моны без фәнни басмаларга нигезләнеп әйтә алабыз Ә өлкәннәр, ата-аналар, әби-бабалар балаларын, оныкларын кочакларга, үбәргә ярата. Мондый һәрдаим контакт өлкәннәрнең үзләренә куркыныч тудыра», — диде Мурашко.
Министр билгеләп үткәнчә, бүген коронавирус таралуны профилактикалау өчен кулланыла торган чаралар балаларны яклауга һәм риск төркемендә булган кешеләрнең сәламәтлеген саклауга юнәлдерелгән.