Балалар бакчасында тәрбияче караватка тотып аткач, сабыйның сөяге сынган
Көндезге йокы вакытында көйсезләнгән бала тәрбияче хатынның ачуын чыгарган.
Чиләбе шәһәрендәге балалар бакчасында бер баланың умрау сөяген сындырганнар. Бу турыда кызның әнисе Ирина Шәфыйкова РЕН ТВ каналына сөйләгән.
Әни кеше сүзләренчә, бакчадан алган чакта, кыз кулы авыртуга зарлана. Башта әти-әнисе моңа игътибар бирми. Ләкин киендергәндә бала елый башлый, Шуннан соң кызны травмпунктка алып баралар.
«Бала өйгә керде дә, йоклый торган сәгать вакытында тәрбияче аны караватка ыргытуын әйтте. Без травмпунктка бардык. Снимок ясагач, аның умрау сөяге сынган булуы ачыкланды», — ди әни кеше.
Нәни бала сүзләренчә, ул көйсезләнә башлый, аннары тәрбияче аны караватка ыргыта һәм сабый иңбашы белән караватның агач өлешенә бәрелә.
Шәфыйкова сүзләренчә, алар балигъ булмаган балалар эшләре инспекторына мөрәҗәгать иткән, Инспектор әлеге вакыйганы тикшерәчәген әйткән.
Балалар бакчасында исә «ун ел чамасы эшләүче тәрбияче болай итә алмый» дип ышандыралар, диелә хәбәрдә.