«Балага җен ияләшә»: Гөлназ Шәрипҗанованы баласына исем кушарга соңга калган дип гаеплиләр
7 гыйнварда Гөлназ һәм Илсур Шәрипҗановларның уллары Минтимер туды.
Гөлназ Шәрипҗанова нәни улына исем куштырганнары турында инстаграмдагы сәхифәсендә язды. Пост язылган урыннан аңлашылганча, алар Актанышта булган.
Инстачылар матур теләкләр теләгән. «Зур рәхмәт барлык изге теләкләрегез өчен. Кабул булсын. Минтимер дигән исемне бар татар мөселман дөньясына таратып, игелекле, тәүфыйклы, ризыклы бала булып үссен», дип җавап язган Гөлназ үзе.
Ул инстаграмдагы постында исем кушу ашыннан фотолар куйган, шунда ук үзенә шелтә белдереп язган кешенең язмаларын да күрсәткән. «Исемне әле куштыгызмыни? Җен ияләшә балага, вакытында исем кушмасаң», дип язганнар. «Сабыйга бала тудыру йортыннан кайткач ук исем кушарга кирәк. Салават Миңнехановтан үрнәк алыгыз», диләр.
Боларга җавап итеп Гөлназ да яза. «Акылсыз инде без шундый. 40 көндә кушалар. Безгә бүген 20 көн», дип язып калдырган. «Кайчан, кайда, ничек, кем икәнен үзебез хәл итәрбез», ди ул.
«Хәзер мәчеткә барып исем куштыру берни дә тормый. Әмма бөтен туганнарны җыеп, исем ашы уздыру үзе бер зур вазифа. Әни бу эшкә зурлап тотына», дигән ул. Гөлназның әнисе өч оныгына исем куштыру ашы үткәргән икән. «Авылыбызга кайту өчен 400 км шул. Шуңа күрә роддомнан чыгуга кайтып җитеп булмады», ди Гөлназ.