Бала вакытында күршесе урлап, сатып җибәргән егет 30 елдан соң анасын эзләп тапкан

Кытайда яшәүче 37 яшьлек ир-атны бала чагында гаиләсеннән урлап алып киткәннәр һәм башка кешеләргә сатканнар. Ир-ат хәзер генә үзенең анасын эзләп тапкан. Ул нәни чакта истә калдырган урыннардан карта ясаган. Бу турыда South China Morning Post басмасына сылтама белән Лента.ру яза.

Ли Цзинвэй исемле малайны дүрт яшендә урлаганнар. Күршедә яшәүче ир-ат аны алып киткән һәм баласыз гаиләгә саткан. Ул туган авылыннан дүрт мең километр чамасы ераклыкта үскән.

Ли үскән саен, анасы, туган ягы турында искә төшергән. Олыгайгач, ул ата-анасын эзли башлаган. Ләкин авыл исемен дә, үзенең чын исемен дә искә төшерә алмаган.

Ли туган йорты турында искә төшергән барлык белешмәне туплап, үзе карта ясаган. Анда өйләр, елгалар һәм кырларны сурәтләгән. Аннары шушы карта буенча полиция һәм волонтерлар ярдәмендә туган ягын эзләп тапкан. Ул Чжаотун шәһәре янындагы авыл булып чыккан.