Пермьдә бер малайны үтерүнең нечкәлекләре ачыкланган. Баланың гәүдәсен җомга көнне иртә белән бер йорт ишегалдындагы чүп савытлары янында тапканнар.
«Московский Комсомолец» газетасы порталы хәбәр иткәнчә, 6-7 яшьлек малайның мәетен, тәгәрмәчле туристик чемоданга тутырып, чүплеккә ташлаганнар.
«Аны яралгы позасында тапканнар», – дип аңлаткан фаҗига шаһитларының берсе. Үлем сәбәбе – пычак белән күпсанлы чәнчүләр. Баланың шәхесе әлегә билгеле түгел. Малайның мәетенә чип-чиста өй пижамасын кидергәннәр, һәм, шуңа бәйле рәвештә, баланы өйдә үтергәннәр, мәетне соңыннан чүплеккә алып килгәннәр, дип фаразлыйлар.