Бал кортлары үлеп беткән умартачы үкереп елый - видео
Чуваш агаеның үкереп елый-елый басуларны агулаучы җитәкчеләрне тәнкыйтьләгән видеосы мессенджерларда таралды.
Бер чуваш умартачысының кортлары үлгәнгә өзгәләнеп, сабый бала кебек үкереп елаганын видеога төшергәннәр. 2019 елгы видео булса да, ул мессенджерларда хәзер генә таралды.
Чувашиянең Канаш районы Маяк авылы умартачысы, кырларны агулар алдыннан кортларын ояларына бикләп куя, ләкин температура күләгәдә дә 25 градуска җитә. Бер оя кортларның яртысы һавага таралган агулы матдәләрдән, икенче өлеше пешеп һәлак була. Бу хәлләрне умартачы бик авыр кичерә. Эсседә кырларны эшкәртергә рөхсәт биргән җитәкчеләргә рәнҗи.
«Бүген һава температурасы күләгәдә 25 градусны күрсәтә. Күрше кырлардагы распны ниндидер матдәләр белән агуладылар. Менә, карагыз, ватаныбыз нәрсә эшли! Кортларымның бөтенесе үлеп беткән. Район җитәкчелеге, карагыз, сез нәрсә эшләдегез. Бары тик сез генә гаепле. Иң көчле оям үлде. Сөенегез! Күпме түзәргә була. Чувашия министрлыгын да, район җитәкчелеген дә „агуламагыз“ дип кисәттек, ничә көннәр ялварып сорадык бит», — ди умартачы үксеп елап.
Кырларны агулы химикатлар белән эшкәртү аркасында умарталыкларда бал кортларының үлүе ел саен күзәтелә торган проблема. Умартачылар зар елый, чәчүлекләр язмышына да кул селтәп булмый. Алтын урталыкны табуы гына авыр.