Шалкан – үзенчәлекле тәмдәге яшелчә. Хуҗабикәләр шалкан уңышына карап аптырап та кала. Бу яшелчәдән нәрсә ясарга була соң?
Иң гадие: бәрәңгегә (50/50) кушып пешерергә һәм боламык ясарга. Шулай ук, томалап яшелчәләр пешергәндә, шалкан да кушарга мөмкин.
Шалканны бал һәм сыер мае белән кыздыру рецептын тәкъдим итәм.
Моның өчен: 700 грамм шалкан, 2 аш кашыгы сыер мае, 3 аш кашыгы бал, тоз, борыч, 1 стакан су һәм 1 аш кашыгы лимон согы кирәк була.
Шалканны эре шакмаклап турарга, табага салырга, су, бал һәм май өстәргә. Кайнап чыккач, табаның өстен каплап 10 минут пешерергә. Аннары капкачын ачарга, утны көчәйтергә, суы парга әверелгәнче һәм шалкан алтынсу төскә кергәнче тотарга. Тәмләткечләр сибәргә һәм лимон согы салып болгатырга.
Тәмле булсын!