Бу күренеш тышкы яктан матур булса да, бакча өчен куркыныч. Кыш көне бозлы яңгыр яуса, ботаклар астына таяныч куегыз яки иң озын ботакларны кисегез.
Мондый яңгыр еш яумый. Бары парадоксаль һава шартлары барлыкка килгәндә генә ява, ягъни җирнең өслегендә температура нульдән түбән төшә, ә атмосфераның өске катламнарында, болытлар барлыкка килгән урында, плюс булып кала. Нәтиҗәдә, су тамчылары, нинди дә булса җир өстенә эләгеп, шунда ук туңалар һәм бозлы «глазурь» барлыкка китерәләр. Бозның калынлыгы 10-15 миллиметрга җитәргә мөмкин.
Бу боз катламы бакча үсемлекләренең ботакларын шактый авырайта. Нәтиҗәдә, алар өстәмә йөкләнешкә түзә алмыйлар һәм сынарга мөмкин. Агачларга гына түгел, ә төрле коммуникацияләргә, мәсәлән, электр чыбыкларына да шундый ук куркыныч яный.
Еш кына бакчачылар, җиргә кадәр бөгелгән ботакларны күреп, алардан бозны ватып төшерергә тырышалар. Чыбыклар яки кабельләр бозланган очракта да шулай. Ләкин болай эшләргә кирәкми. Чөнки нәтиҗәдә алар зарарланачак. Әмма үсемлекләрне дә ярдәмсез калдырырга ярамый.
Мондый очракта иң гади эш – таяныч кую. Мул уңыш биреп, ботаклар сыгылып төшкәндә дә шундый ук «таянычлар» куялар.
Озын ботакларның очларын кыскартырга мөмкин. Әлбәттә, кышкы чорда кисү кирәкми, әмма бозлы яңгырның аяныч нәтиҗәләрен бетерү өчен кисәргә кирәк.