Бәбигә узган 18 яшьлек кызны бер фатирда яши торган танышлары күпердән елгага ыргыткан

Колымада яшәүче 18 яшьлек кызны, бәбигә узгач, күпердән елгага ыргытканнар. Биредә яшәүче Төркия кешесе аны коткарган. Бу турыда «Вести» каналы хәбәр итте.

17 яшьлек егет, 16 яшьлек кыз һәм 18 яшьлек кыз Магаданда фатир арендалап яши. 18 яшьлек кызның бәбигә узуын танышлары белә. Бәби туу аларның планына керми. Шуңа күрә алар авырлы дус кыздан котылырга, аның акчаларын үзләренә алырга була, диелә бу хәбәрдә.

Россия Тикшерү комитетының Магадан өлкәсе буенча Тикшерү идарәсе җинаять эше ачкан. Тикшерү белешмәсе буенча, 17 яшьлек егет, 16 яшьлек кыз, бергәләп, 18 яшьлек танышларын үтерергә карар кыла, алар кызның авырлы булуын белә.

Фаҗига 9 июльдә Ола бистәсендә була. Егет белән кыз хәйләле план төзи. Имеш, егетне бандитлар шантажлый, аңа ярдәм итү өчен, берничә эш эшләргә кирәк. Шулай итеп алар авырлы дус кызларын Ола елгасы аша күпергә алып килә. Биредә егет авырлы кызны суга ыргыта. Бу вакытта 16 яшьлек кыз, 18 яшьлек кызның смартфонын алып, аның бер дустына хәбәр яза – имеш, 18 яшьлек кыз үз-үзенә кул салган.

18 яшьлек кыз суга егылып төшкәч, аңын югалтмый, өскә йөзеп чыга һәм ярдәм сорап кычкыра. Ләкин агым аны тиз арада диңгезгә таба алып китә башлый. Шул чакта яр буенда балык тотып утыручы ир-ат – Төркия кешесе – ярдәмгә килә. Кызны коткаралар, аның баласы да исән. Ул хастаханәдә ята.

Суга ыргытучы егетне кулга алалар, аңа ярдәм иткән кыз чыгып китмәү турында имза куйган. Алар гаебен таныган, тикшерү эксперименты вакытында барысын да күрсәткән, диелә хәбәрдә.