Бөтенләй ит ашамасаң, нәрсә була?
Вегетарианлык диетасын тотучылар рационга ит ризыкларын бөтенләй кертми.
Рационда бөтенләй итле ризыклар булмаса, кеше организмында бик мөһим витаминнар һәм минераллар дефициты башлана, анемия барлыкка килә, тешләр бозыла. Бу турыда РИА Новости агентлыгына диетолог Ольга Кораблева сөйләгән.
Табиб сүзләренчә, итсез рационга адаптациянең беренче көннәрендә корсак күперә, газлар барлыкка килә. Аннары вегетарианлыкка күчү дәвамында D, B12 витаминнары, йод, фосфор һәм кальций җитешсезлеге күзәтелә.
Моннан тыш, тешләр бозыла, чәч коела башлавы ихтимал, тән тиресе корый. Тырнаклар да сынучанга әверелүе ихтимал.
«Анемия куркынычы арта. Соңрак стадияләрдә сез сулыш җитмәүдән, энергия булмаудан, гел йокы килүдән, тиз арудан интегә башларсыз», — ди Ольга Кораблева.
Ул вегетарианлык диетасы һәрвакытта да начар нәтиҗәгә китермәскә мөмкин булуын да искәртә. «Ярты елга бер анализлар тапшырыгыз. Мәсәлән, кан һәм бәвелгә гомуми анализ. Ферритин, тимер һәм башкаларны тикшереп торыгыз», — дип киңәш итә диетолог.