Бөре шәһәрендә мәктәп янында сукбай этләрдән курыккан балалар агачка менеп качкан
Агач башында утыручы малайларны видеога төшереп алганнар.
Башкортстанның Бөре шәһәрендә сукбай этләр балаларны куркыткан. Мәктәп янында йөри торган этләрдән качу өчен нәни малайлар агач башына менеп качкан. Бу турыда «Башкортстан» телеканалы хәбәр итте.
Агач башына качкан балаларны видеога төшереп алганнар.
Икенче сыйныфта укучы балалар чипсы алырга гына чыккан булган. Малайлар кибеттән чыккач, аларга сукбай этләр чирүе ияргән. Балалар куркып, агач башына үрмәләгән.
Бәхеткә, укытучы Алексей Яшков килеп чыккан һәм этләрне куып җибәргән. Имгәнүчеләр юк.
Әлеге вакыйгадан соң республика прокуратурасы тикшерү башлаган. Күзәтчелек ведомствосында «Вести» канал хәбәрчесенә аңлатма биргәннәр. Прокуратура вәкиле әлеге видеода сурәтләнгән фактның раслануын әйткән. Шәһәр администрациясе адресына постановление җибәргәннәр.
Бу хәлләрдән соң 22 сукбай этне тотканнар.
Тикшерү эшләре бара, диелә хәбәрдә.