Әбҗәлил районындагы авылда мәчет янган
Иске мәчеттә ял көннәрендә генә намаз укый торган булганнар.
12 ноябрь кичендә Башкортстанның Әбҗәлил районындагы Салават авылында мәчет янган. Бу турыда «Башинформ» хәбәр итте.
Ут мәчет эченнән чыккан. Республика буенча Гадәттән тыш хәлләр министрлыгы белешмәсе буенча, янгын вакытында мәчет эчендә кеше булмый, фаҗигадә һәлак булучылар һәм зыян күрүчеләр юк.
«Мәчет мичкә ягып җылытыла. Шулай ук җылыту конвекторлары да кулланылган. Мәчеттә ял көннәрендә генә намаз укыганнар», — дип аңлатканнар ведомствода.
Янгынны сәгать ярым эчендә сүндергәннәр. Ут чыгу сәбәпләре ачыклана.
Бу авылда яңа мәчет тә бар, диелә хәбәрдә.
