Бәхетле булу өчен нинди гадәтләрне ташларга кирәк?
Сез әйләнә-тирәдәге бөтен кешене бәхетле итә алмыйсыз, тырышмагыз да.
Клиник психолог Карен Ниммоның бәхетле булу өчен алты тәкъдиме киңәшләр сайтында чыкты.
«Бушлыкка» зарланып утырмагыз. Берни үзгәртеп булмаганын белә торып, постлар, твитлар язып ятудан ни файда? Игътибарны үзгәртеп була торган әйберләргә юнәлтегез, һичьюгы шуларны үз контролегезгә алыгыз.
Миңа да яхшы булыр әле дип көтеп ятмагыз. Һәркем үз бәхетен үзе ясый. Хыялдагы эш «башка ишелеп төшкәнен» көтеп ятканчы, бәлки үзеңә үзең эш урыны оештырып караргадыр?
Бөтен нәрсәне дә «дөп-дөрес итеп» эшләргә маташмагыз. Америка президенты хатыны Элеонора Рузвельт сүзләрен искә төшерегез: «Башкалар сезнең турында сирәк уйлаганын аңласагыз, минем турында алар ни уйлар дип борчылмас идегез». Сез әйләнә-тирәдәге бөтен кешене бәхетле итә алмыйсыз, тырышмагыз да. Ничек кенә тырышсагыз да, канәгатьсез кешеләр табыла, идеаль булырга маташмагыз.
Артка карап, узганнарны искә төшереп утырмагыз. Вакытны кире борып булмый, хаталарны төзәтү дә мөмкин түгел. Үпкәләткән, зыян салган кешеләрдән гафу үтенегез дә, үзегезне борчып ятмагыз.
Белә торып, үзеңнең сәламәтлегеңә зыян салмаска кирәк. Сәламәтлек кешенең иң зур байлыгы. Алкоголь, фастфуд, уеннар, шопинг, соцчелтәрләр, порно белән үзеңне тынычландырып маташмагыз. Алар иртәме-соңмы сезнең сәламәтлекне барыбер какшатыр.
Гел бер тапталган юлдан барырга тырышмагыз. Иң кызыклы һәм файдалы тәҗрибә тапталган юлдан чыгып, яңа сукмактан барганда барлыкка килә.