Бүген Мәскәүдә бер фатирда дүрт кешене атып үтергәннәр

Мәскәүнең төньягында торак йорттагы фатирда җәнҗал вакытында дүрт кешене атып үтергәннәр. Бу мәгълүматны РИА Новости агентлыгы Россия Тикшерү комитетының Мәскәү буенча Тикшерү идарәсенең рәсми вәкиле Юлия Ивановага сылтама белән хәбәр итте.

Фаҗига бүген Приоров урамындагы 38нче йортта була. Хәбәрдә «Фатирда дүрт мәет — ике бала, бер ир-ат, бер хатын-кыз мәете табылды», диелгән иде.

Аннары төгәлрәк мәгълүмат чыкты. «Башта ике бала һәм ике олы кеше үлде дигән хәбәр чыккан иде. Соңрак өч олы кеше һәм бер бала үлүе турында билгеле булды», дип яза агентлык

Әлеге вакытта урында тикшерүчеләр эшли. 

«Әлеге җәнҗал көнкүрештәге конфликт аркасында килеп чыккан, аның нечкәлекләре ачыклана. Күршеләр сүзләренчә, талаш төштән соң башлана, аннары тавыш чыга, балалар елаша. Ату тавышы ишеткәч, күршеләре полиция чакыра», дип хәбәр итте «Комсомольская правда».

РИА Новости хәбәр иткәнчә, күрше йортта яшәүче кеше бу хәлне күреп торган. Ул кибеттән кайтып килешли йорт янында полиция күрә. Урынга ашыгыч ярдәм дә килгән була. Бу кеше ике-өч тапкыр аткан тавыш ишетә. 

«Атканнан соң бер хатын кычкырды, анда ике бала да бар иде», — ди ул. 

Шаһит сүзләренчә, атучы кеше фатир ишеген ачмаган, хокук саклаучылар аны ватып кергән. 

«Вести» каналы ике хатын-кыз, бер ир-ат һәм бер бала мәете табылды, дип ачыклык кертте. Алар арасында атучы кешенең мәете дә бар, диелә бу хәбәрдә.