Бөгелмәдә танылган журналист Сергей Голубев фаҗигале рәвештә үлгән
Танышлары һәм якыннары 49 яшьлек Сергей Голубевны бик мәрхәмәтле иде дип искә ала.
Бөгелмәдә танылган журналист Сергей Голубев 49 яшендә вафат булды. Ул 10 майда Соколка тавына фото төшерергә дип менә һәм егылып төшә. Шуннан соң Сергей комага китә һәм тугыз көннән соң үлә. Бу турыда «Татар-информ» агентлыгы хәбәр итте.
- Соколка тавы — Бөгелмәнең иң биек ноктасы, анда менгәч, шәһәр уч төбендәге кебек күренә
«Сергей бик мәрхәмәтле, ачык һәм позитив, юмор хисле кеше иде. Бик авыр вакытта да ярдәм итте. Без бергә бик күпне кичердек, 2018 елда телеканал ябылуын да бергә уздык. Ул беркайчан да төшенкелеккә бирелмәде, көче ташып тора иде. Безнең өчен бу бик зур югалту», — дип сөйли мәрхүмнең якын дусты, «РЕН-ТВ-Бөгелмә» телеканалының элеккеге редакторы Ирина Герасимова.
Сергей Голубев бик озак вакыт биредәге телеканалда эшли, спорт блогын алып бара, «Личное мнение» программасының авторы була. «Бөгелмә авазы» басмасында да эшләп ала, сәяхәткә йөри, автостоп белән Европага кадәр барып җитә, шәһәрдәге шахмат клубында дәресләр бирә.
«Без аның белән 15 ел чамасы бергә эшләдек. Аның булмавына ышана да алмыйм. Мин аннан да ихласрак, укымышлы кешене белмим», — ди Ирина Герасимова.
Сергейның әнисе һәм кызы ятим калган.
Журналистны иртәгә, 22 майда, 13 00 сәгатьтә Бөгелмәнең Октябрь урамындагы 19 йортның 4 подъезды каршыннан соңгы юлга озаталар.