Бөгелмәдә ике егет таксистны чәнчеп үтереп, машинасын яндырган
Исерек пассажирлар такси өчен акча түләүдән баш тарткан.
Бөгелмәдә бер таксистны үтереп, машинасын яндырганнар. Җинаятьтә шикләнелүче ике егетне тоткарлаганнар. Бу турыда «Татар-информ» агентлыгына үз чыганаклары хәбәр иткән.
Ике исерек егет Азнакайдан Бөгелмәгә бару өчен такси чакырта. Шәһәргә килеп җиткәч, алар такси өчен түләүдән баш тарта. Шуннан соң җәнҗал чыга. Егетләр таксистның аркасына пычак кадый. Аннары исерек егетләр машинаны һәм аның эчендә утырган ир-атны яндырырга карар кыла.
Яна торган машинаны шаһитлар күреп ала. Алар янгын сүндерүчеләргә хәбәр итә. Янгынны сүндергәч, машина эчендә таксист мәете табылган.
Хокук саклаучылар ике егетне тоткарлады. Алар Чистай һәм Азнакай кешеләре булып чыккан. Берсенә 23 яшь, икенчесенә 25 яшь, диелә бу хәбәрдә.
