Бөерләргә таш утырмасын өчен нишләргә?
Бөерләрендә таш булмаган яки махсус диетада утырмаган кеше көненә 2-3 литр су эчәргә тиеш, диде табиб.
Эссе һава торышы булганда суны күп эчәргә киңәш итәләр, әмма бөерләрдә таш барлыкка килүне кисәтү өчен уртача температура булганда да җитәрлек күләмдә су эчәргә кирәк. Бу хакта онколог-уролог Ярослав Потаповка сылтама белән РИА Новости яза.
Җәй көне суны 2-3 тапкыр күбрәк эчәргә кирәк. Хәер, организмда су балансын җайда тотуны һәрдаим кайгыртып тору зарур: су җитмәү аркасында бәвел бүлеп чыгару органнарында таш утырырга мөмкин, дип кисәтә табиб. Аның сүзләренчә, бөерләрдә башта ком, аннан таш утыру төрле сәбәпләр аркасында килеп чыга, шуларның берсе — су җитмәү.
«Алар бик күп: метаболик, гормональ тайпылышлар, кешенең тормыш рәвеше үзенчәлекләре, туклану — болар барысы да бөерләргә таш утыруга сәбәп була ала. Һәм бу сәбәпләрнең берсе — җитәрлек күләмдә су эчмәү», — диде Ярослав Потапов.
Каршы күрсәтмәләр булмаганда, көн саен эчәргә кирәкле су күләме билгеле, диде белгеч.
«Бөерләрендә таш булмаган яки махсус диетада утырмаган кеше көненә 2-3 литр су эчәргә тиеш, бу норма», — диде табиб.
Бу очракта сүз чиста су турында гына түгел, ә гомумән сыеклык турында бара: чәй, кофе, морс яки шулпа — су балансы өчен моның әллә ни әһәмияте юк.
Шул ук вакытта кайбер кешеләр өчен су нормадан күбрәк тә кирәк була ала, болар — спортчылар, шактый күп физик активлык алып баручылар.
«Спортчылар, бигрәк тә бодибилдинг белән шөгыльләнүчеләр тәүлегенә 6-7 литр сыеклык эчә. Алар махсус диеталар тоту аркасында су да күбрәк кирәк», — диде табиб.