Татарстанның Азнакай районында көчле яңгырлар аркасында күл ярларыннан чыккан. Бу турыда «Татар-информ» яза.
Сәпәй авылы янындагы күлнең ярларыннан чыгуы һәм дамба юыла башлау турында шаһитлар социаль челтәрләрдә язган. Алар сүзләренчә, җирле халыкның бакчаларын су баскан һәм алар яңа явым-төшем аркасында хәл тагын да катлауланачак дип борчыла.
«Татар-информ»га Россия Гадәттән тыш хәлләр министрлыгының Татарстан буенча Баш идарәсендә хәбәр итүләренчә, хәвеф-хәтәр турында бүген иртән хәбәр иткәннәр.
«РСЧС тырышлыгы белән әйләнмә каналлар үткәрү буенча эшләр башкарылды. Дамба аша ташу тукталган, су биеклеге кими. Торак секторны су басмаган», – дип сөйләделәр Гадәттән тыш хәлләр министрлыгында.
Алдарак ведомство республикада шторм кисәтүе игълан иткән иде һәм көчле явым-төшемнәр булганда иминлек чараларын искәртте.