Азат Фазлыевның Президент йортын карап йөрисе килә
Җырчы виртуаль дусларына үзе белән интервью тәкъдим иткән.
Азат Фазлыев инстачыларга үзе белән әңгәмә тәкъдим иткән. «Бу интервьюны карап чыксагыз, мине яхшы беләчәксез. Ихлас җавапларым сезнең күңелегезгә хуш килер дип ышанам», — дип язган җырчы.
— Өч сүз белән үзеңә характеристика бир.
— Тырышлык, максатым, үҗәтлек бар.
— Өч тискәре сыйфат?
— Ялкаулык, кирелек бар, кайвакыт эшне сузам.
— «Невидимка» га әйләнсәң, кая барырга теләр идең?
- Самолетның очучы бүлмәсенә керер идем. Президентларның йортларын карар идем. Нинди матурлык, ничек эшләнгәнен карар идем. "Невидимка" булсам, рәхәтләнеп кереп, карап йөрер идем.
- Нинди билгеле шәхес белән күрешеп сөйләшеп утырыр идең?
- Габдулла Тукай белән сөйләшеп утырыр идем. Яп-яшь егет татар дөньясына үз өлешен кертеп калдырган кеше белән сөйләшеп утырасым килә.
- Нәрсәдән куркасыз?
- Мин берничә әйбердән куркам. Якыннарым өчен куркам, авырый күрмәсеннәр. Ялгыз картлыктан куркам. Авылдагы нигезебезнең йозакка бикләнүеннән куркам.