Чаллы телеканалында «Ачыктан-ачык» тапшыруында Азат Фазлыев кунак булды. Тапшыруны алып баручы Лилия Гатина җырчыдан йорт салу эше барышы турында сорады.
«Бу – хыял. Бу – минем күптәнге хыял. Ул әти-әни исән вакытында, үз концертымны кую хыялы да әти-әни исән вакытында чынга ашарга тиеш иде.
Мин 1995 елда «Әтнә сандугачы» конкурсында лауреат исемен алдым. Шуннан соң аларга: «Мин артист булам, сез Казанда минем концертларымда икәүләшеп утырачаксыз», – дидем. 1995 ел иде. 20 ел вакыт – бу үтәлмәде. Вакыты сукмады, диимме? Үкенеч тә түгел. Алар булганда, мин аны эшли алмадым. Димәк, ул вакытта мин өлгермәгәнмен. Өй турында да мин аларга: «Менә мин артист булам да бай булам. Сезгә өй салам, сезне Казанга алып китәм. Чит илдәге кебек, икегез бассейнда коенып ятарсыз», – дип әйтә идем. Шул вакытта әни: «Бездән кайтып сорамасаң, шул җитә безгә», – дип әйткән иде.
Әти күрде, йортның нигезен дә, төзелеп беткәнен дә күрде, әмма ремонт ясап әзер булганын күрмәде. Урыннары җәннәттә булсын. Безгә көч биреп торсыннар. Барыбыз да шунда барасы. Әти-әниле йортка кайту – әйбәт, әнинең дә ризыклары сагындыра. Кайвакытта «хәзер ашар идем әни пешергәнне» дип уйлыйсың. Тик андый ризык бер ресторанда да юк. Әлбәттә, мин дә, балалар да сагына», – дип сөйләде җырчы
«Җылы, күңелгә үтеп керә торган әңгәмә булды, әле болай күз яшьләр чыкканы юк иде», – диде алып баручы, яшьләрен сөртеп.
Бу хакта Азат Фазлыев Чаллы телеканалыны видеосында 23.00 минутта сөйли башлый.