Азат Фазлыев хатынын ачулана, Илсөя эчәсе чәен оныткан, Ряхимова белән Рәхимова - "Татарча солянка"дан репортаж

Казанның "УНИКС" концертлар залында "Хитлар солянкасы" узды. Концертта эстраданың популяр артистлары үзләренең хит җырларын башкарды. Тамашада без дә булдык, игътибарыгызга фоторепортаж тәкъдим итәбез.

Концертны "Бәхет тукталышы" һәм "Хыял" җырлары белән ИлСаф башлап җибәрде.

Ильмира Нәгыймова бу юлы ире Русланнан башка гына килгән. Аның "Буламы соң?", "Гомер үтеп бара" җырларын хәтерлисездер инде?

Ләйсән белән Ильмира бер-берсенең хит җырларын җырлады.

Ильмира - "Яшьлегем чишмәләре"н, Ләйсән "Гомер үтеп бара"ны башкарды.

Таныйсызмы? Бу - Мәскәү кызы Динара Ряхимова! Аның "Ташлама" җырын радиода көне-төне җырлаталар.

Алсу Фазлыеваны Азаты ачулана: "Әйдә тизрәк, хәзер безнең чыгыш! Ә син һаман фотога төшәсең!"

Закир Шаһбан тормыш иптәше Гөлүсә белән. Закир әфәнде чыгыш ясаганда, җыр авторларын, концертны алып баручыларның һәм үзенең исемен дә әйтергә онытмый! Афәрин!

Иң күп алкышлар Закир Шаһбанга булды бугай...

Менә алып баручылар үзләре - Булат Бәйрәмов һәм Газинур Фәйзуллин!

Соңга калмадылар, җитештеләр! Фазлыевларның "Гөрләп кирәк яшәргә" җыры, чынлап та, хит!

"Мин әле икенче бүлектә генә җырлыйм. Әйдә чәй эчәбез!" - дип, Рифат Зарипов чәй белән сыйлады, рәхмәт үзенә!

Чәй янына Илсөя Бәдретдинова да килеп кушылды. Ну Илсөя фотоаппарат күрсәме?! Чәен онытып "позировать" итә башлады!

Күрше өстәлдә җырчы Илназ Минвәлиев чәйләп утыра. Кулында - телефон иде. Әллә безне төшерә инде?

Ришат Фазлыйәхмәтов сәхнәгә чыгып җырлады да, "ашыгам" дип бәрелә-сугыла чыгып чапты...

Өстәрәк Динара Ряхимова турында әйткән идек. Ә монысы - Айгөл Рәхимова! "Рәхимова - эстрадада бер генә! Дөрес итеп яз безнең фамилияләрне!" - диде. Баксаң, берсе - Ряхимова, икенчесе Рәхимова икән!