Азат Фазлыев фокус күрсәтте
Җырчы тормыш иптәше Алсу Фазлыеваның бөтен теләкләрен күз ачып йомганчы чынга ашыра.
Азат Фазлыев тормыш иптәше Алсу Фазлыеваның теләкләрен тормышка ашыручы фокусникка әверелгән. «Фокус»ның иң шәбен җырчы үзенең инстаграм сәхифәсенә куйган.
Видеода Алсу белән Азат көз килеп җитүе турында сөйләшәләр. Алсу: «Ярамыйм шундый салкын, яңгырлы көзләрне. Мин җылыны, кояшны яратам», — ди Азатка.
«Кояш кирәкмени сиңа? Ярар алайса», — ди Азат. Шул мизгелдә фон җырчыларның диңгез буенда утырган кадрларына алышына.
«Менә сиңа җылы, менә сиңа диңгез. Менә мин шундый фокусник. Диңгез безне сагынган, без диңгезне сагындык», — ди Азат.
Ә инде чынлап сөйләгәндә, җырчы пар Сочига ял итәргә киткән. Алсу Фазлыева үзенең инстаграм аккаунтында кояшлы фотолары белән бүлешә дә башлады инде.
«Шәп фокус», — дип күңелле яллар теләгәннәр җырчы парга инстачылар. «Кирәкмәгән вирус кына алып кайтмагыз инде. Халык тик тора алмый бит. Үлгәнен дә белми, картларга йоктырам дип тә уйламый», — дип язучылар да булган.
Фазлыевларны күреп, җырчы Рифат Зариповның да диңгезгә барасы килеп киткән. «Безнең гаиләгә дә шундый фокус күрсәт әле, Азат абый», — дип комментарий калдырган ул.