Азат Абитов операциясенең ничек үтүе турында сөйләде
Азат Абитов 2010 елда тез сеңерләрен өздергән булган. Төрле сәбәпләр аркасында, җырчы операцияне ун елга кичектереп торган.
Җырчы Азат Абитовның операциясе уңышлы үткән. Үзенең операциягә ятуы турында ул инстаграм сәхифәсендә хәбәр иткән иде. «Интертат» бу турыда язды.
«Дуслар, кичәге посттан соң борчылып язучылар, шалтыратучылар бик күп булды. Ихлас теләкләрегез өчен тагын бер тапкыр рәхмәт.
Иҗатымны күзәтеп баручылар минем үлеп футбол яратканымны белә. Бу мәхәббәт нәтиҗәсез калмады — 2010 елда теземнең сеңерләрен өздердем. Операция күптәннән планлаштырылды. Ләкин төрле сәбәпләр аркасында, операцияне ун елдан соң гына ясаттым. Моңа мин бик шат, шуңа фотода бәхетле күренәмдер.
Операцияне әйбәт үтте, диделәр. Ләкин табиб: «Без уйлаганнан әз генә авыррак килеп чыкты», — диде. Минем сеңерләрне алыштырдылар һәм менискны алып аттылар.
Икенче аякка да шундый операция кирәк, анысының сеңерләре 2017 елда өзелде. Шуңа күрә тагын җиде ел түзеп була әле», — дип яза җырчы.
Азат Абитов үзенең инстадусларына аяк-кулларны сакларга, табибларга вакытында мөрәҗәгать итәргә кушкан.
Җырчының хәле әйбәт, ул тиздән өенә кайтачак. Сентябрь урталарыннан Азат Абитовның тормыш иптәше Гөлсирин Абдуллина белән гастрольләре башланып китә.
Җырчының виртуаль дуслары Азатның исән-имин терелеп чыгуын теләгәннәр, сакланып йөрергә кушканнар. Араларында: «Безгә дә шундый операция ясатырга кирәк иде. Кайсы хастаханәдә һәм кайсы табибта ясаттыгыз?» — дип кызыксынучылар да бар.