Азат Абитов белән Ранис Габбазовка бик тә уңайсыз шартларда җырларга туры килгән

Яшь җырчылар Ранис Габбазов белән Азат Абитов үз гомерләрендә иң үзенчәлекле концерт куйганнар. Бу хакта алар социаль челтәрләрдә сөйли.

«Оренбург өлкәсе Каргалы авылында концертның беренче җырын җырлап бетерү белән ут сүнде. Тиздән ут булыр дип, баянга җырлый башладык. 10, 20, 30, 40 минут узды – ут бирмиләр. Шулай итеп, 2 сәгатькә якын концертны микрофонсыз, утсыз, баянга җырлап чыктык. Бер тамашачы да кайтып китмәде, ахырга кадәр безгә кушылып җырлап, алкышлап утырдылар. Зур рәхмәт Каргалыдагы тугры тамашачыларыбызга. Иң моңлы һәм иң җылы концерт булды ул», – дигән егетләр.