Айваз Садыйров уйланулары: «Без түзәрбез, балаларыбызның киләчәге матур булсын…»
Теле-радио тапшырулар алып баручысы, «Тәртип» радиосының продюсеры Айваз Садыров килеп туган вәзгыятькә карата үз фикерен инстаграмда болай дип җиткергән.
«Кызык… Безнең әби-бабайлар авыр чорда үскәннәр. Өйләнешеп, балалар алып кайтканда юклыктан интеккәннәр. «Без түзәрбез, балаларыбызның киләчәге матур булыр», — дип яшәгәннәр.
Балалары, ягъни безнең әти-әниләр үсеп җиткән. Гаиләләр корганнар. Балалар, ягъни безне тапканнар. Тагын кыен чаклар ишек шакыган. «Без түзәрбез, киләчәктә балаларыбыз якты көннәрне күрәчәк», — дип өметләнеп яшәгәннәр алар да.
Без үсеп җиттек. Парлашып, балалар үстерә башладык. Әти-әниләр теләгән якты көннәр дә килде кебек.
Тарихны кабатлап, «Без түзәрбез, балаларыбызның киләчәге матур булсын», — диясе килми. Һичшиксез, аларның киләчәге якты, тыныч булырга тиеш. Әмма хәзергебез дә шундыйга лаек бит! Әби-бабайлардан килгән бу чылбыр бездә өзелергә тиеш, ләбаса!» — дип язган ул.
Чынлап та, һәр чорның үз рәхәте белән бергә, үз михнәте, авырлыгы, ахырзаманы… Дөнья ниндидер әйләнештә… Ил-көннәребез имин, җан-тәннәребез тыныч булсын иде.
