Айсылу Лерон белән кызыклы хәл килеп чыккан
Теле-радио тапшырулар алып баручысы Айсылу Лерон бик күп еллар элек үзе белән булган бер кызыклы вакыйганы инстаграмда искә алган.
«Бә-ә-әк күптән булган хәл! Борын-борын заманда Илтөзәр Мөхәммәтгалиевның 40нчы үлчәмле артсыз аяк киемен (шлепанцасын) өстәреп йөрдем шулай. Биш көн! Ә нигә дип сорагыз! Чөнки башка аяк киеме юк иде…
Кыскасы, болай булды бу: моннан егерме ел элек (әбәү!) теплоходта татар яшьләре өчен биш-алты көнлек сәяхәт оештырдылар. Мин уйламаган-көтмәгән җирдән шул теплоходка утырып киттем: кулда бер кечтеки генә сумка, аякта — «басанужки» и всю!
Беренче җәяүле экскурсиядә үк аяк киемемнең үкчәләре миңа «хуш!» диделәр. Нишләргә? Кибеткә барып алырга акчам да бар югыйсә, тик график шулай көйләнгән, каядыр барып йөрү мөмкинлеге юк. Шунда бәхетемә Илтөзәрнең запас «шлепка”лары булып чыкты. Аяклар чак өстерәсә дә, шуның белән йөреп чыктым бит бөтен планлаштырган экскурсия-чараларны!
Кем әйтмешли, главное не унывать! Тәпечке генә табыла икән ул.
Бүген безнең студиягә эфирга килгәч тә, Илтөзәр белән шул вакыйганы искә алдык! Рәхмәт, нык коткардың ул чакта, Илтөзәр. «Яланаяклы кыз» була идем алайса», — дип язган Айсылу һәм күптәнге дусты белән төшкән фотоны урнаштырган.
Бу хәл турында укып, Айсылуның инстадуслары көлгәннәр. «Тирәбездә яхшы кешеләр» дигән матур сериалдан бер күренеш булган ич бу», — дип язган берәү.