Айлин туган көненә чакыра
Бу шимбәдә җырчы Айлин үзенең туган көнен якыннары, дуслары һәм иҗатын сөючеләр белән бергә уздырырга җыена.
Бәйрәм ресторанда фуршет форматында үткәрелә, Айлинның һәм аның иҗатташ дусларының чыгышы көтелә. «Түгәрәк дата түгелдер бит?» дигән сорауга җырчы серле елмаеп: «Юбилейны гына зурлап уздырырга димәгән лә, күңел халәтем шундый, күбрәк кешеләр белән танышасым, аралашасым килә. Туган көнемне шул рәвешле уздыруны матур бер традициягә әверелдерәсе иде, монысын киләчәк күрсәтер», — дип җаваплады.
Туган көн - матур итеп киенеп, елмаеп-көлеп, бүләкләр һәм котлаулар кабул итә торган көн ул. Айлин үзе дә кунаклары өчен бүләкләр әзерләп куйган. 26 декабрьдә «Печь» ресторанына (Казан шәһәре, Шаһабетдин Мәрҗани урамы, 10 йорт») 12.00 -17.00 сәгатьтә Айлинны тәбрикләргә килегез.
