Айгөл һәм Ришат Шәйхетдиновлар Яңа елны яңа йортта каршы алачаклар
Җырчы гаилә белән бер концертта сәхнә артында аралашып алдык. Быел Шәйхетдиновлар Яңа ел бәйрәмен яңа йортта каршы алырга ниятлиләр. Үз куышыбыз булуына сөенәбез, ди алар.
- Без өйләнешкәннән соң һәрвакыт бер хыял белән яндык. Тизрәк үз куышыбызны булдырасы, йорт салып чыгасыбыз килде. Әлеге теләгебез чынга ашты, яңа йортыбыз Чаллыда урнашкан. Җәй көне күченү мәшәкатьләре белән мәш килдек. Бу Яңа ел бәйрәмен гаиләбез белән үз өебездә каршы алачакбыз. Кунакларга чакыручылар булды, ләкин берәүнең дә тәкъдимен кабул итмәдек. Быел әлеге бәйрәмне аеруча көтәбез. Аннан соң безнең ел якынлаша икән бит, Ришат белән мин кабан елында дөньяга килгәнбез. Шуның өчен әлеге елга зур өметләр баглыйбыз. Иң мөһиме - җан тынычлыгы, сәламәтлек юлдаш булсын, - дип сөйләде Айгөл Шәйхетдинова.
